संवैधानिक समितिया सभापतिलय् आचार्य
संवैधानिक समितिया सभापतिलय् नेपाली कांग्रेसया सभासद निलाम्बर आचार्य निर्वाचित जुयादीगु दु ।
शुक्रवाः सुथय् तक स्वंगू प्रमुख दलत नेकपा (एमाले), नेपाली कांग्रेस व एकीकृत नेकपा (माओवादी)या शीर्ष नेतात दथुइ जूगु सहलहलय् सहमति मजुइवं सत्ता गठबन्धन दलया उम्मेदवार आचार्य व माओवादीया उम्मेदवार नारायणकाजी श्रोष्ठ 'प्रकाश'या दथुइ सभापति पदया निंतिं निर्वाचन जूगु खः ।
निर्वाचित जुइधुंकाः सभापति आचार्यं समितिं यायेमाःगु ज्या तत्काल न्ह्याकेगु धयादिसें ईलय् हे संविधान निर्माण जुइगु प्रतिक्रिया बियादिल । वयेकलं थुकी माओवादीया नं ग्वाहालि दइगु विश्वास प्वंकादिल ।
निर्धारित ई स्वयां स्वघौ लिबाक्क जूगु संवैधानिक समितिया बैठकय् मत विभाजन जुइवं जूगु मतदानय् सभापति आचार्यया पक्षय् २९ मत व विपक्षय् २१ मत लाःगु खः । अथेहे माओवादी पाखें उम्मेदवार जुयादिम्ह प्रकाशया पक्षय् २१ व विपक्षय् २९ मत लाःगु खः ।
समितिइ ६३ स्वम्ह दुजःत दुगु खसां ५०म्ह दुजःतय्सं जक मतदान प्रकृयाय् ब्वति काःगु खः । प्यम्ह दुजःतय् मेगू समितिलय् नं मतदान यायेधुंकूगुलिं वयेकपिसं थुगु समितिलय् मतदान कायेमदुगु खः । अथेहे तराई-मधेश लोकतान्त्रिक पार्टीया स्वम्ह सभासद्तय्सं थः कार्यकर्तातय्त दुर्व्यवहार याःगु धासें मतदान बहिष्कार याःगु खः । अथेहे राप्रपा नेपाल, नेमकिपा, नेकपा (एकीकृत) लगायत दलतय्सं नं मतदानय् ब्वति मकाः ।
थ्वस्वयां न्ह्यः समितिया बैठकया दुजःतय्सं थःथःगु बिचाः प्वंकूगु खः । बैठकय् न्ववायेगु झ्वलय् चीचीधंगु अधिकाशं दलया सभासदतय्सं सहमति, सहकार्य व एकता आःया आवश्यकता जूगुलिं सहमति मार्फत हे सभापति ल्ययेत इनाप याःगु खः ।
सभापति पदय् नियुक्त जुयादिम्ह आचार्ययात निर्वाचित जुइवं सभामुख सुवाष नेम्वाङं सपथ ग्रहण याकादीगु दु ।
नेकपा (एमाले)या वरिष्ठ नेता माधवकुमार नेपाल प्रधानमन्त्री जुइवं खाली जूगु सभापति पदय् निर्वाचित जुयादिम्ह अचार्य नेपालया संविधान २०४७ सालया मस्यौदाकार मध्येया छम्ह खः । २०४७ सालया अन्तरीम सरकारया न्याया व कानुन मन्त्री तकं जुयादीधुंकूम्ह आचार्य श्रीलंकाया पुलांम्ह राजदूत नं खः । २०१९ सालं निसें विद्यार्थी राजनीतिलय् सक्रिय जुयादिम्ह आचार्यया राजनीतिक पृष्ठभूमि कम्युनिष्ट पार्टीनाप दुगु खसां २०४८ सालय् वयेक कम्युनिष्ट पार्टी त्वताः नेपाली कांग्रेसय् दुहांवंगु खः । आचार्य नेपाली कांग्रेसपाखें मनोनित जुयाः संविधानसभाया सभासद जुयादीगु खः ।
