नेपाःया विशेषता कथं संघीयता : स्वीस राजदूत
नेपाःया निंतिं स्वीस राजदूत थोमस गेसं नेपाःया थःगु हे कथंया पहिचान व विशेषता दुथुलिं नेपालं थःगु हे कथंया विशेषताया आधारय् संघत निर्माण यायेमाःगु खँ धयादीगु दु ।
शुक्रवाः येँय् जूगु छगू साक्षात्कर ज्याझ्वलय् न्ववानादिसें राजदूत गेसं नेपाःया सीमान्तीकृत, अल्पसंख्यक व ल्यूने लाःगु जाति व क्षेत्रयात सम्बोधन यासें संघीयताया निर्धान यायेत सुझाव बियादिल । वयेकलं नेपाःया संघीयता नेपाःया हे आधारय् निर्धारण जुइमाःगु खँय् बः बियादिसें थुकी राष्ट्रिय सहमति आवश्यक जूगु धयादिल ।
राजदूत गेसं स्वीटजरल्याण्डया थःगु हे इतिहास दुगु धयादिसें स्वीस संघीयतया विशेषता थःगु हे कथंया जूगुलिं नेपालं अज्याःगु हे हुबहु संघीयता नालेमज्यूगु धयादिल । वयेकलं स्वीटजरल्याण्डया तुलनाय् नेपाःया सामाजीक, संस्कृतिक व जातीय मुद्दात जटिल जूगुलिं थंज्याःगु दक्वं मुद्दायात बांलाक संम्बोधन याइगु कथं केन्द्र व क्वयेया निकायया नियन्त्रण व सन्तुलनया संयन्त्र बल्लाकेमाः धयादिल ।
ज्याझ्वलय् वयेकलं शान्ति व विकास नापनापं न्ह्यावनीगुलिं सरकारं लगानीया निंतिं सुरक्षाया बांलागु व्यवस्था यायेमा: धयादिसें स्वीटजरल्याण्ड नेपाःया विकासय् ग्वाहालि यायेत तयार जूगु धयादिल ।
