संविधानया व्याख्या संसद मार्फत
संविधानसभाया न्यायप्रणली समितिं राष्ट्रिय महत्वया पद व प्रमुख राजनीतिक मुद्दाय् संविधानया व्याख्या संसदं यायेगु प्रस्ताव पारित याःगु दु ।
समितिया शुक्रवाः च्वंगू बैठकय् मत बिभाजन जुइवं मतदान जूगु खः । मतदानतय् संसद माफर्त राष्ट्रिय महत्वया पद व प्रमुख राजनीतिक मुद्दाय् संविधानया व्याख्या संसदं यायेदइगु प्रस्तावया पक्षय् बहुमत दुजःतय्सं समर्थन याःगु खः । प्रस्तावय् संविधान व कानुननाप ज्वःलाःगु विषयलय् सर्वोच्च अदालतं मखसें संसदं व्याख्या यायेगु खँ न्ह्यथंनातःगु दु ।
माओवादीया उगु प्रस्तावय् २० मत लाःगु खसाः विपक्षय् १९ मत कुतुवंगु खः । प्रस्तावयात मधेशवादी दतय्सं नं समर्थन याःगु खसाः कांग्रेस व एमालेया सभासदतय्सं विपक्षय् मतदान याःगु खः ।
बिहीवाः थुगु प्रस्तावया विषयलय् जूगु सहलहलय् माओवादीया सभासद् अग्नि सापकोटां राजनीतिक विषयलय् अदालतं व्याख्या यायेब्यूसाः राजनीतिक जटिलता ब्वलनीगु बिचाः प्वंकादीगु खसाः कांग्रेसया सभासद राधेश्याम अधिकारीं व्यवस्थापिकां थंज्या:गु विषयलय् संविधानया व्याख्या याःसा न्यायालय संसदया अधिनय् लायेफूगु बिचाः प्वंकादीगु खः ।
