पीडिततय्त वास्ता मयाः
येँ (सन्ध्या टाइम्स)/ पश्चिम नेपालय् वःगु खुसिबाः व चलखं प्रभावित जूपिंत सरकारं वेवास्ता याःगु द्वपं अनया जनतां बिउगु दु ।
कैलालीया खुसिबाः व चलखं प्रभावित जूपिंत वःन्हुमछि दयेधुंकाः नं सरकारं चिउताः मतःगु द्वपं उमिसं बिउगु खः।
कैलालीइ सलंसः परिवार खुसिबाः व चखलं प्रभावित जुयाच्वंगु दु ।
कैलाली, कञ्चनपुर व डडेलधुराय् थगुने थें तुं धनजनया क्षति मजूसां सलंसः बिगाहा बुँइ पिनातःगु वा बाली धाःसा नष्ट जूगु दुसा थ्यंमथ्यं ७ हजार परिवार विस्थापित जूगु दु।
'जिगु बुँया वा बाली फुक्कं नष्ट जुल, आः जिं परिवारयात छु नकाः लहीगु, गन वनेगु?' छम्ह पीडित किसानं दुःख प्वंकल।
वंगु भदौ १ व २ गते वःगु खुसिबालं आपालं मनूत प्रभावित जूगु खः ।
खुसिबालं उलिमछि जनता पीडित जुलं नं सरकारं छुं हे चिउताः मतःगु द्वपं उमिसं बिउगु दु ।
उखे कैलाली जिल्ला अधिकारी शिवप्रसाद नेपालं धाःसा पीडिततय् अभिलेख तयेगु यायेगु ज्या जुयाच्वंगु खँ कनादीगु दु ।
अभिलेख कायेगु ज्या क्वचायेवं राहतया ज्याझ्वः न्ह्याकेगु खँ नं वय्कलं धयादीगु दु ।
उखे खुसिबालं पीडिततय्त राहत बीत छगू समिति गठन याये धुनागु जानकारी प्रमुख जिल्ला अधिकारी राजेन्द्र घिमिरें बियादीगु दु ।
