विशेष समितिं ज्या याये मफु
येँ (सन्ध्या टाइम्स)/माओवादी जनसेनाया पुनर्स्थापन यायेत स्वनातःगु विशेष समितिं छुं हे ज्या याये मफयाच्वंगु खँ शान्ति तथा पुनर्निर्माण मन्त्री रकम चेम्जोङं धयादीगु दु। वय्कलं म्हिगः छगू सञ्चार माध्यमलिसे खँल्हाबल्हा यायेगु झ्वलय् उगु खँ धयादीगु खः। वय्कलं प्राविधिक पुचलं ज्या यानाच्वंगु जूसां नं विशेष समितिया बैठक तकं च्वने मफयाः माओवादी जनसेनाया शिविरय् च्वंपिं अयोग्य लडाकुया व्यवस्थापन यायेत समस्या जुयाच्वंगु खँ नं कनादीगु दु।
माओवादी जनसेनाया व्यवस्थापन यायेगु निंतिं सरकारं फक्व कुतः यानाच्वंगु खःसां नं माओवादीपाखें समितिया दुजःया निंतिं नां छ्वया महःगुलिं विशेष समितिं ज्या याये मफयाच्वंगु द्वपं नं वय्कलं बियादीगु दु ।
थःपिंसं थीथी शिविरय् च्वंपिं माओवादीया अयोग्य लडाकुतय् धलः दयेके धुनागु खँ कनादिसें वय्कलं आः याकनं नं माओवादी लडाकुयात व्यवस्थापन यायेगु खँ नं कनादीगु दु। तर गबलय् तक जुइ धइगु खँय् धाःसा वय्कलं कनामदी ।
