किपू बजार व्यवस्थापनया तःमुँज्या
किपू (सन्ध्या टाइम्स)/किपू बजार व्यवस्थापन समितिया प्रारम्भिक तःमुँज्या सभासद् दिलीप महर्जनं उलेज्या यानादिल। ज्याझ्वलय् वय्कलं किपू नगरपालिकां पुलांगु हे ढंगं ज्या यानाच्वंगु व सम्बन्धित निकायपाखें बजेट हयाः ज्या याये मफुगुलिं धः व लँ फुक्कं स्यनाच्वंगु खः धयादिल।
ज्याझ्वलय् कीर्तिपुर बजार व्यवस्थापन समितिया सल्लाहकार प्रयागमान महर्जन, ज्ञानबहादुर महर्जन, चन्द्रबहादुर महर्जन, किपू नगरपालिकाया प्रतिनिधि सानुबाबु परियारपिंसं भिंतुना देछानादिल। व्यवस्थापन समितिया अध्यक्ष धर्म महर्जनया सभापतित्वय् जूगु उगु ज्याझ्वलय् धर्म महर्जनया हे अध्यक्षताय् झिंछम्ह दुजः दुगु न्हूगु ज्यासना पुचः ल्यःगु दु ।
न्हूगु ज्यासना पुचःया उपाध्यक्ष सुजन महर्जन, सचिव राजेन्द्र महर्जन, कोषाध्यक्ष नरेश महर्जन च्वनादीगु दु। अथे हे दुजलय् बुद्धिमान महर्जन, जीतलाल महर्जन, कृष्णभक्त महर्जन, त्रिचन्द्र महर्जन, भीमदास महर्जन, हीरा महर्जन व नविन जोशी च्वनादीगु दु ।
