ख्वपय् नीछन्हुयंकं सितलामाजुया म्येँप्याखं
ख्वप (सन्ध्या टाइम्स)/नेवाः भासं अज्ञात कविं च्वयातःगु सितलामाजुया म्येँहना प्याखं ख्वपया त्वाःत्वालय् नीछन्हुयंकं न्ह्यब्वल। सापारुया लागिं न्ह्यब्वये हःगु उगु प्याखं थुगुसीया 'मास्टर पीस' कथं तसकं सुथांलानाः न्ह्यानाच्वंगुलिं त्वाःत्वालं चन्दा म्हयाः थःथःपिनि हे व्यवस्थापनय् ख्वपन्यंकं क्यनेज्या न्ह्यानाच्वंगु खः। सापारु च्यान्हुया लागिं धाःसा नीछन्हुयंकं मदिक ख्वपया थीथी त्वालय् यंकाः थुगु प्याखं क्यनाच्वंगु दु। मय्जु सानुमैंया ताम्रकार मू गायक व नारायणभक्त सुवाल सह गायक जुयाः न्ह्यानाच्वंगु उगु म्येँहना प्याखनय् सुनिता खुसू, मुना स्यामा व चण्डिका स्वनेपां प्याखं हुलादीगु खः ।
अथेहे बद्रीनारायण ताम्रकार नापं बद्रीभक्त खर्बुजां उगु म्येँया लागिं संगीत बियादीगु दु। रामभक्त बाइजू, वासुदेव सुवाल, आस्था मानन्धर, उर्मिला व हरिकुमारपिं नं ग्वाहालि प्याखंम्वः कथं म्हिताच्वंगु दु। थुगु प्याखं विनाता कला सदनया सक्रियताय् क्यनाच्वंगु खः ।
थ्व झ्वलय् बुधवाः सिद्धि स्मृति प्रतिष्ठानया सभाकक्षय् विनाता कला सदनया कलाकारतय् प्रतिभा ब्वज्या जुइत्यंगु दु ।
