श्रेष्ठ व आचार्य दथुइ सभापति पदया निंतिं धेंधेबल्ला
संवैधानिक समितिया सभापतिया निंतिं एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाश' व संविधानविद् निलाम्बर आचार्यं थःथःगु नां दर्ता यायेवं शुक्रवाः सभापति पदया निंतिं निम्ह नेतात दथुइ धेंधेंबल्ला जुइगु जूगु दु ।
प्रमुख स्वंगू दलत दथुइ सहमति जुइमफेवं माओवादीं व कांग्रेसं थःथःगु हे उम्मेदवारी दर्ता याःगु खः । माओवादीं थ्वस्वयां न्ह्य: सभापति पदया निंतिं नां न्ह्यनेहम्ह डा. बाबुराम भट्टराईंया थासय् माओवादीं मेम्ह उपाध्यक्ष प्रकाशया नं दर्ता याःगु खः । नेतां भट्टराई नं थः सहमतिया आधरय् त्याइगु सुनिश्चित जुसाः जक नां दर्ता यायेगु धायेवं प्रकाशया नां दर्ता याःगु खँ सिदुगु दु ।
माओवादी उपाध्यक्ष प्रकाशया उम्मेदवारीया निंतिं डा. बाबुराम भट्टराई प्रस्तावक जुयादीगु खसाः देव गुरुङं उकी समर्थन यानादीगु ख: ।
अथेहे सत्ता गठबन्धन नीनिगू दलया पाखें संविधानविद् निलाम्बर आचार्यया नां दर्ता याःगु ख: । नेपाली कांग्रेसया नेता केवी गुरुङं वयेकया नां प्रस्ताव यानादीगु खसाः कांग्रेसया सुप्रभा घिमिरे व एमालेया अग्नी खरेल समर्थकया कथं च्वनादीगु ख: ।
सभापति पदया निंतिं नां दर्ता यायेत फ्यानात:गु ईया दुने श्रेष्ठ व आचार्यं जक नां दर्ता यायेवं शुक्रवाः सभापति पदया निंतिं निम्ह नेतात दथुइ धेंधेंबल्ला जुइगु जूगु दु ।
