संवैधानिक समितिया सभापतिया निंतिं थःथःगु दलया उम्मेदवारी बीगु
प्रमुख स्वंगू दल दथुइ संवैधानिक समितिया सभापति सहमतिया मार्फत चयन यायेत च्वंगु बैठकय् सहमति जुइमफेवं सभापतिया निंतिं एकीकृत नेकपा (माओवादी) व नेपाली कांग्रेसं थःथःगु हे उम्मेदवारी बीगु जूगु दु ।
नेपाली कांग्रेसया सभापति गिरिजाप्रसाद कोइरालाया छेँय् महाराजगंजय् एमाले, कांग्रेस व माओवादी दथुइ बिहीवाः जूगु बैठकय् माओवादीं थःगु न्हापाया हे अडान काःगु खसाः कांग्रेसं नं सभापतिया निंतिं थःगु हे उम्मेदवारी बीगू अडान कायेवं सहमति जुइमफूगु खः ।
बैठक लिपाः माओवादी उपाध्यक्ष नारायणकाजी श्रेष्ठ 'प्रकाशं' दलत नाप सहमति मजूगुलिं आः थःगु हे उम्मेदवार दर्ता यायेगु खँ धयादीगु दु । माओवादीं समितिया सभापतिया उम्मेदवारया निंतिं उपाध्यक्ष डा. बाबुराम भट्टराईया नां न्ह्यने सारे यायेधुंकूगु दुसाः कांग्रेसं निलाम्बर आचार्यया नां न्ह्यने सारे याःगु दु ।
थ्वस्वयां न्ह्यः माओवादीं बिहीवाः सुथय् समितिया सभापति पदया निंतिं ग्वाहालि यायेत चीचीधंगू पार्टीत नाप सहलह याःगु खः । माओवादी प्रवक्ता दिनानाथ शर्मां राप्रपा, राप्रपा नेपाल, नेकपा (संयुक्त), चुरभावर नेपाल, नेपाः राष्ट्रिय पार्टी लगायत झिंनिगू चीचीधंगू दलतय्सं माओवादीयात ग्वाहालि यायेगु बंच ब्यूगु जानकारी बियादिल ।
एमाले नेता माधवकुमार नेपाल प्रधानमन्त्री जुइवं खाली जूगु संवैधानिक सभापतिया पदया निंतिं शुक्रवाः निर्वाचन जुइत्यंगु दु ।
