संविधान निर्माण यायेमबीत षड्यन्त्र : ज्ञवाली

नेकपा (एमाले)या सचिव युवराज ज्ञवालीं निर्धारित ईलय् हे संविधान निर्माण जुइमबीगु षड्यन्त्र जुयाच्वंगु खँ धयादीगु दु ।

प्रेस चौतारी दाङं बिहीवाः सुथय् घोराहीलय् याःगु पत्रकार सम्मेलनय् ज्ञवालीं निर्धारित ईलय् संविधान निर्माण जुइमबीत छुं छुं शक्तितय्सं षड्यन्त्र यानाच्वंगु द्वपं बियादीगु दु । वयेकलं गुलाः दुने संविधान निर्माण यायेमाःगु व शान्ति प्रकृयायात निष्कर्षय् थ्यंकेमाःगु आःया प्रमुख आवश्वयता जूगु धयादिसें सहमति व सहकार्यया आवश्यकता अपरिहार्य जूगु बिचाः प्वंकादिल ।

एमाले सचिव ज्ञवालीं देय्या स्वार्थया निंतिं न्ह्याः वनेमाःगु ईलय् व्यक्तिगत व दलगत स्वार्थ अप्वःगु धयादिसें थंज्याःगु स्वार्थया कारणं देय् अग्रगति पाखे वनेमफुगु धयादिल ।