न्यायाधीस नियुक्ति व कारवाही व्यवस्थापिका पाखें
न्हूगु संविधानय् न्यायाधीसया नियुक्ति व कारवाही व्यवस्थापिकां याइगु जूगु दु । संविधान सभा अन्तर्गत न्याय प्रणाली सम्बन्धी समितिया बिहीवाः च्वंगु बैठकय् न्यायाधीस नियुक्ति व कारवाहीया विषयलय् मत विभाजन जुइवं मतदान मार्फत निर्णय याःगु खः ।
समितिया बैठकय् एनेकपा (माओवादी) लगायातया दलतय्तं न्यायाधीस नियुक्ति व्यवस्थापिका संसदं यायेमाःगु प्रस्ताव याःगु खसाः कांग्रेस व एमालें धासाः न्यायापरिषद पाखें न्यायाधीस नियुक्त यायेमाःगु प्रस्ताव याःगु खः । मत विभाजन जुइवं जूगु मतदानय् व्यवस्थापिका पाखें न्यायाधीस नियुक्त यायेमाःगु पक्षय् २३ मत हःगु खसाः उकीया विपक्षय् १९मत जक कुतुवंगु खः ।
अथेहे न्यायाधीसया कारवाहीया विषयलय् नं मत विभाजन जूगु खः । कांग्रेस व एमालें पदीय मर्यादा पिने वनाः ज्या याइम्ह न्यायाधीसयात न्यायपरिषदं कारवाही यायेमाःगु प्रस्ताव याःगु खसाः माओवादी लगायत दलतय्सं व्यवस्थापिकां हे कारवाही यायेमाःगु अडान काःगु खः । थुगु विषयलय् जूगु मतदानय् नं व्यवस्थापिकां कारवाही यायेमाःगु पक्षय् २३ मत हःगु खसाः विपक्षय् १९ वंगु खः ।
