खय् भासं सपथ कायेमखु : उपराष्ट्रपति
उपराष्ट्रपति परमानन्द झां खय् भासं सपथ मकायेगु खँ धयादीगु दु । बुधवाः भाषिक अधिकार संघर्ष समितिया प्रतिनिधिमण्डल नाप खँल्हाबंला यानादिसें वयेकलं खय् भासं सपथ मकायेगु थःगु पुलांगु अडान हानं कयादीगु खः ।
भाषिक अधिकार संघर्ष समितिं बुधवाः खय् भासं सपथ मकायेत वयेकयात ज्ञापन पौ लःल्हाःगु खः । उगु झ्वलय् वयेकलं समितिया प्रतिनिधित नाप थः राजीनामा बीत तयार दु तर खय् भासं सपथ कायेत तयार मदुगु खँ धयादीगु खः ।
नेपालय् ल्हाइगु गुइनीगू भाय् मध्ये खय् भाय् बाहेकया गुइछगू भाषाभाषीतय् प्रतिनिधित्व यासें समितिं उपराष्ट्रपति झायात खय् भासं सपथ मकायेत सुझाव ब्यूगु खः । समितिं हानं सपथ काये हे मासाः मैथली भासं सपथ कायेत इनाप याःगु खः ।
अथेहे समितिं थौं हे राष्ट्रपति डा. रामवरण यादवयात उपराष्ट्रपतियात खय् भासं सपथ मकायेकेत ज्ञापन पौ लःल्हाःगु खः । जनजाति महासंघया अध्यक्ष पाशाङ शेर्पा, भाषिक नेतात पद्यमरत्न तुलाधर, सुरेश आले मगर, सीताराम तामाङ, गोपाल ठाकुर लगायतया पुचलं ज्ञापन पौ लःल्हाःगु खः ।
