अनमिनया भूमिका प्रति असन्तुष्टि
शान्ति व पुननिर्माण मन्त्री रकम चेम्जोङं माओवादीया लडाकुत ल्वाभः सहित सार्वजनिक थासय् वंगु शान्ति सम्झौता विपरीत जूगु खँ धयादीगु दु । वयेकलं ल्वाभः अनुगमनय् अनमिनया भूमिका कमजोर जूगु द्वपं नं बियादिल ।
बुधवाः येँय् जूगु छगू ज्याझ्वलय् वयेकलं ल्वाभः सहित लडाकुतय् वसः पुनाः शिविर पिने जूगुलिं आपक्ति प्वंकादिसें माओवादीया अज्याःगु गतिविधिं शान्ति प्रकृयायात असर लाकीगु धयादिल । वयेकलं अनमिनया भूमिकाया विषयलय् सम्बन्धित अधिकारीत नाप खँल्हाबंला यायेगु नं धयादिल ।
अथेहे कांग्रेस कार्यवहाक सभापति सुशिल कोइरालां नं अनमिनया भूमिका प्रति च्यूता प्वंकादीगु दु । माओवादीं शान्ति सम्झौता विपरीत अदण्ड ज्या जारी तयेगुलिइ अनमिनया ल्हाः दुगु द्वपं बियादिल ।
ट्रेड युनियन संयुक्तं बुधवाः येँय् याःगु ज्याझ्वलय् न्ववानादिसें वयेकलं ल्वाभः व कम्ब्याटय् माओवादी लडाकुत शिविर पिनेवना साधारण जनता व सुरक्षाकमीतय्त ख्यायेगु ज्या यानाच्वंगु ईलय् नं अनमिनं छुं मयाःगु दुर्भाग्यपूर्ण जूगु टिप्पणी यानादिल ।
