२४ गतेनिसें गुरुङ पूर्ण प्र.से.
येँ (सन्ध्या टाइम्स)/ थौं च्वंगु मन्त्रिपरिषद्या बैठकं कायम मुकायम प्रधानसेनापति छत्रमान गुरुङयात वइगु भदौ २४ गतेनिसें प्रधानसेनापतिइ नियुक्ति यायेगु निर्णय याःगु दु।
मन्त्रिपरिषद्या बैठकं महासेनानी कृष्णशमशेर जबरा व तेजमानसिंह बस्नेत लिसें सहायक सेनानी विकास विक्रम शाहया सेवा अवधि निदँ तनेगु निर्णय नं याःगु खँ सञ्चार मन्त्री शंकर पोखरेलं कनादीगु दु ।
थौंया बैठकय् विशेष यानाः उपराष्ट्रपति परमानन्द झाया शपथ प्रकरणयात कयाः सहलह जुइगु धाःसां उकिया बारे गुगुं नं कथंया सहलह मजूगु खँ नं मन्त्री पोखरेलं कनादिल। उकियात कयाः लिपा सहलह यायेगु कथं बैठकय् छुं हे खँ मवः धाःगु दु ।
थौंया बैठकय् उपराष्ट्रपतिया बारे खँ पिहां वल धाःसा मधेशी मन्त्रीतय्सं कडा प्रतिवाद यायेगु तयारी यानाच्वंगु खः।
उखे थौं मन्त्रिपरिषदया बैठक च्वने न्ह्यः नेपाली कांग्रेसया कार्यवाहक सभापति सुशील कोइरालां कांग्रेसया मन्त्रीत लिसे सहलह यानादीगु खः। उगु इलय् उपराष्ट्रपति प्रकरणय् कांग्रेसया मन्त्रीतपाखें छु खँ तयेगु धइगु बारे सहलह ब्याकूगु खँ सूत्रं धाःगु दु ।
थौं सुथय् प्रधानमन्त्री तथा मन्त्रिपरिषद्या ज्याकुथी जूगु उगु बैठकय् प्रमया भारत भ्रमण व न्यायपालिका व कार्यपालिकाया अधिकार क्षेत्रया बारे नं सहलह जूगु खः।
लिसें बैठकय् थीथी आयोगय् खाली जुयाच्वंगु पदाधिकारी नियुक्त यायेगु बारे नं सहलह जूगु खँ धाःगु दु ।
