काभ्रे नेवाः पुचःया जिल्ला अधिवेशन
भ्वँत(सन्ध्या टाइम्स)/काभ्रे नेवाः पुचःया जिल्ला अधिवेशन नेवाः देय् दबूया नायः नरेश ताम्रकारं रेडक्रस भवनय् उलेज्या यानादिल। उगु ज्याझ्वलय् न्ववायेगु झ्वलय् नायः ताम्रकारं स्वनिगलय् नेवाःतय्गु अग्राधिकार कायम यायेगु निंतिं आत्मनिर्णयया अधिकार सहितया जातीय स्वशासन माःगु खँ न्ह्यथनादिल ।
काभ्रे नेवाः पुचःया सचिव टिकाभक्त भ्वँमिं वार्षिक प्रतिवेदन न्ह्यब्वयादीगु ज्याझ्वलय् उपाध्यक्ष पुष्परञ्जन नेवाः, सल्लाहकार आशाकाजी श्रेष्ठ, ज्ञानकाजी मानन्धर व झी नेवाः पुचःया प्रधान सम्पादक मोहन दुवाल व नेवाः देय् गुथि नेपालमण्डलया नायः नरेन्द्रभक्त हाडापिंसं न्ववानादीगु खः।
अधिवेशनं सिद्धिबहादुर कर्माचार्यया अध्यक्षताय् झिंछम्ह दुजः दुगु न्हूगु ज्यासना पुचः ल्यःगु दु। न्हूगु ज्यासना पुचःया उपाध्यक्ष पुष्परञ्जन नेवाः, सचिव टिकाभक्त भ्वँमि व कोषाध्यक्ष दिलहरि श्रेष्ठ च्वनादीगु दु। अथे हे दुजलय् सोमकाजी शाक्य, कृष्णगोपाल कर्माचार्य, निर्मला यंगोल, सिद्धिबहादुर जोशी, श्रीराम श्रेष्ठ, सुरेन्द्र श्रेष्ठ व विधान जोशी च्वनादीगु दु ।
ज्यासना पुचःया न्हापांगु बैठकं संरक्षकय् ज्ञानकाजी मानन्धर, आशाकाजी श्रेष्ठ व मोहन दुवालयात सल्लाहकार मनोनित याःगु दुसा मेपिं निम्हेसित कार्यसमितिया दुजः कथं ल्यःगु दु। अथे हे बैठकं देय् दबूया केन्द्रीय पार्षद् नं ल्यःगु दु ।
