गुरुङयात प्रधानसेनापति नियुक्त यायेत सिफारिस
मन्त्रिपरिषदया बैठकं कामु प्रधानसेनापति छत्रमानसिंह गुरुङयात भदौ २४ गते निसें लागू जुइ कथं प्रधानसेनापतिलय् नियुक्त यायेत राष्ट्रपतियात सिफारिस यायेगु निर्णय याःगु दु ।
बुधवाः सुथय् च्वंगु मन्त्रिपरिषदया बैठकं महासेनानीत कृष्णशमसेर जवरा व तेजमानिसंह बस्नेत व सहायक सेनानी विकासविक्रम शाहया सेवा अवधि निदँ थप यायेगु निर्णय नं याःगु दु ।
अथेहे बैठकं शिक्षामत्री रामचन्द्र कुशवाहाया अध्यक्षय् शिक्षा सेवा आयोगय् दुजःतय् नियुक्तिया निंतिं सिफारिस समिति गठन यायेगु निर्णय याःगु दु । उगु समितिइ त्रिभुवन विश्वविद्यालयया उपकुलपति व शिक्षा सचिव दुजः कथं च्वनीगु जूगु दु । नापं बैठकं विज्ञान व प्रविधि मन्त्रालयया सल्लाहकारय् डा. केदारचन्द्र शर्मायात नियुक्त यायेगु निर्णय याःगु दु ।
बैठकय् प्रधानमन्त्रीया भारत भ्रमण व उपराष्ट्रपतिया सपथ प्रकरणया बारे नं सहलह जूगु खँ सुचना व संचार मन्त्री नापं सरकारया प्रवक्त शंकर पोखरेलं कनादिल ।
