उपराष्ट्रपतियात राजीनामा बीत प्रचण्डया सुझाव
एकीकृत नेकपा (मोओवादी)या अध्यक्ष पुष्पकमल दाहाल 'प्रचण्डं' सपथ प्रकरणया खँय् विवादित जुयादिम्ह उपराष्ट्रपति परमानन्द झायात राजीनामा बीत सुझाव बियादीगु दु ।
बुधवाः सुथय् बुटवलय् ग्वसाःग्वःगु पत्रकार सम्मेलनय् अध्यक्ष प्रचण्डं भाषा विवाद तसकं गम्भीर जूगुलिं विवाद मुक्त जुइत उपराष्ट्रपतियात राजीनामा बीत सुझाव बियादिल । वयेकलं अन्तरिम संविधानय् उपराष्ट्रपतिं खय् भासं सपथ कायेमाःगु व्यवस्था दुसां माओवादी धासाः थः मां भासं सपथ कायेदयेमाःगु पक्षय् दुगु धयादिल ।
अथेहे वयेकलं पत्रकार सम्मेलनय् नागरिक सर्वोच्चता बहाल मजुतल्ले छुं हे सहमति मजुइगु व न्हू सत्ता समिकरण नं मजुइगु धयादिल । दलत दथुइ सहमति जुसा: ईलय् हे संविधान निर्माण जुइगु धयादिसें वयेकलं थुकी कांग्रेस सभापति व एमाले अध्यक्ष नं चिन्तित व गम्भीर जूगु धयादिल । अथेहे वयेकलं माओवादी व कांग्रेसया न्हूगु समिकरण जुइगु खँ हल्ला जक जूगु धयादिल ।
