'उसाँय् मदयाहे मवनागु खः'
परराष्ट्रमन्त्री सुजाता कोइरालां थः उसाँय् मदया हे प्रधानमन्त्री माधवकुमार नेपालया भारत भ्रमणय् मवनागु स्पष्टीकरण बियादीगु दु ।
मंगलवाः थःगु हे पार्टी नेपाली कांग्रेसया संसदीय दलया ज्यकूथी सिंहदरवारय् स्पष्टिकरण बीत थ्यंकादिम्ह मन्त्री कोइरालां धयादिल, 'जी उसाँय् मदया हे भारत भ्रमण मवनागुलिं थुकीया तःधंगु 'इस्यु' दयेके मजिल ।'
वयेकलं प्रधानमन्त्रीया विदेश भ्रमणया झ्वलय् गुलिखें देय्या परराष्ट्रमन्त्रीतय्सं ब्वति मकाःगु प्रसंग न्ह्यथंनादिसें थःगु बचाउ यानादिल । वयेकलं पार्टी पाखें उर्जामन्त्री डा. प्रकाशसरण महतया उपस्थिति दुगुलिं थःगु अनुपस्थितिं उली असर मलाःगु दाबी यानादिल ।
कांग्रेस पार्टी दुने व पिने मन्त्री कोइरालाया तच्वकं विरोद्ध जुइवं संसदीय दलं वयेकयाके स्पष्टिकरण माग याःगु खः । मन्त्री कोइरालां थ्वस्वयां न्ह्यः लिखित जवाफ छ्वःगु खसां संसदीय दलं वयेक स्वयम उपस्थित जुया स्पष्टिकरण बित निक्वःगु पौ छ्वःगु खः ।
स्पष्टिकरण बीत संसदीय ज्याकूथी थ्यंकादीगु ईलय् मन्त्री कोइरालाया समर्थक कार्यकर्तातय्सं वयेकया पक्षय् नाराबाजी याःगु खः ।
