संवैधानिक समितिया सभापति सहमति कथं
संवैधानिक समितिया सभापति पदया निंतिं लिप्पांगु ईलय् सहमति मलीगु जूगु दु । मंगलवाः नेपाली कांग्रेस व नेकपा (एमाले)या शीर्ष नेतातय् दथुइ जूगु बैठकय् सहमति जुइमफुसा नीनिगू दल पाखें मंकाः उम्मेदवारयात ग्वाहालि यायेगु सहमति जूगु दु । बैठकय् कांग्रेसया नेतातय्सं सभापति पद थःगु हे पार्टीयात दयेमाःगु अडान कायेवं एमालें सहमतिया निंतिं मेमेगू दलनाप सहलह यायेमाःगु लिसः ब्यूगु खः ।
बैठकय् एमाले पाखें प्रधानमन्त्री माधवकुमार नेपाल, नेतात भरतमोहन अधिकारी, विष्णु पौडेल, भिम आचार्य व कांग्रेसया पाखें कार्यवहाक सभापति सुशील कोइराला, उपसभापति रामचन्द्र पौडेल, प्रकाशमान सिंह व डा. रामशरण महतं ब्वति कयादीगु खः ।
थ्वस्वयां न्ह्यः सत्ता गठबन्धन दलया चीचीधंगू राजनीतिक दलनाप जूगु सहलहलय् संवैधानिक समितिया सभापति सहमतिया कथं ल्ययेत तःधंगु दलतय् सुझाव ब्यूगु खः । एमाले संविधान सभादलया ज्याकूथी मंगलवाः जूगु बैठकय् संविधान निर्माण व शान्ति प्रकृयायात निष्कर्षय् थ्यंकेत दलत दथुइ सहमति जरुरी जूगु धासें समितिया सभापति नं प्रमुख स्वंगू दल पाखें हे ल्ययेमाःगु बिचाः नेतातय्सं प्वंकूगु खः ।
