नेवाः देय् गुथिया स्वक्वःगु देय् मुना क्वचाल
येँ (सन्ध्या टाइम्स)/नेवाः देय् गुथि नेपालमण्डलया स्वक्वःगु देय् मुना क्वचाल। वंगु शनिवाः थनया जमलय् च्वंगु चेम्बर भवनय् जूगु उगु ज्याझ्वःया उलेज्या शान्ति तथा पुनःनिर्माण मन्त्री रकम चेम्जोङ्गं त्वाःदेवाय् मत च्याकाः यानादीगु खः ।
गुथिया न्हापांम्ह न्वकु किरण शाक्यं लसकुस यानाः न्ह्याःगु उगु ज्याझ्वलय् देय् गुथिया सल्लाहकारपिं लक्ष्मण राजवंशी, मल्ल के. सुन्दर, राजेन्द्र श्रेष्ठं थःथःगु नुगःखँ प्वंकेगु झ्वलय् सरकार व तामाङ्ग संघर्ष समिति दथुइ जूगु सहमतिइ स्वयम्भु व नमुराया विषयय् आपत्ति प्वंकुसें नेवाः राज्य प्राप्तिया लँय् सशक्त कथं न्ह्याः वनेमाःगु बिचाः प्वंकादीगु खः ।
गुथिया नायः नरेन्द्रभक्त हाडाया सभापतित्वय् जूगु ज्याझ्वलय् नेवाः राज्य संघर्ष समितिया दुजः खलःतपाखें नेवाः ल्यायम्ह न्ह्यलुवाया कजि नरेशवीर शाक्य, नेवाः लोकतान्त्रिक संघया नायः सानुराजा शाक्य व नेवाः देय् दबूया नायः नरेश ताम्रकारपिंसं नं थःथःगु नुगःखँ प्वंकादीगु खः ।
उद्घाटन सत्र लिपा न्ह्याःगु बन्द सत्रय् गुथिया मू छ्याञ्जे विष्णु चित्रकारं प्रगति प्रतिवेदन व दांभरि कृष्णप्रसाद नापितं आर्थिक प्रतिवेदन न्ह्यब्वयादीगु खः। बन्द सत्रय् न्ह्यब्वःगु प्रतिवेदनयात सहलह यानाःलि पारित याःगु खः ।
उगु देय् मुनाय् इलय् हे संविधानसभापाखें नेवाः राज्य सहितया थीथी जातीय प्रदेश दइ कथंया संघीयताया लिधंसाय् राज्य पुनर्संरचना जुइमाःगु माग सहित थीथी प्रस्तावत पारित याःगु खः ।
