गुणस्तरहीन खाद्यान्नयात कारवाही
येँ (सन्ध्या टाइम्स)/ संयुक्त राष्ट्रसंघ विश्व खाद्य कार्यक्रम अन्तर्गत नेपाःया थीथी जिल्लाय् ध्वगीगु खाद्यान्न इना बिउगु बारे आन्तरिक छानविन मयाःगु खँय् नेपाःया अधिकारीतय्सं असन्तुष्टी प्वंकूगु दु ।
जाजरकोटय् न्यनावंगु झाडाबान्ताया छता कारण विश्व खाद्य कार्यक्रम अन्तर्गत जाजरकोटय् इना बिउगु खाद्यान्नं जूगुलिं नेपाःया अधिकारीतय्सं छानविन यायेगु संकेत बिउगु दु।
कृषि तथा सहकारी मन्त्रालयया प्रवक्ता हरि दाहालं सरकारं विश्व खाद्य कार्यक्रम अधिकारीत लिसे खँ ल्हायेगु ज्या मजूगु खँ कनादिसें विश्व खाद्य कार्यक्रमं थःगु गल्ति स्वीकार मयासें अःखतं आक्रोश प्वंकादीगु दु ।
वय्कलं विश्व खाद्य कार्यक्रम अन्तर्गत इना बिउगु खाद्यान्नया बारे छानवीन यानाः कारवाही यायेमाःगु खँय् सरकार दृढ दुगु खँ कनादीगु दु ।
विश्व खाद्य कार्यक्रमं इना बिउगु खाद्यान्नयात कयाः नेपाःया थीथी जिल्लाय् झाडाबान्ता न्यना वनेवं इन्सेकं उकियात कयाः छानवीन यायेगु झ्वलय् जाकि, केँ व चिकं गुणस्तरहीन जूगु धासें उकिया नमुना खाद्य प्रविधि तथा गुणस्तर नियन्त्रण विभागय् हयाः परीक्षण याःगु खःसा विभागं उगु खाद्यान्न मनूयात जक मखु पशुयात तकं नके मजिउगु खँ धाःगु खः ।
वंगु छुं न्हि न्ह्यः जक विश्व खाद्य कार्यक्रमया प्रमुख रिचर्ड रेगनं थःपिंसं खाद्यान्न इनेगु इलय् गुणस्तर जाँच यानाः जब इनाच्वनागु दावी याःगु खः ।
