नेप्से ७०० अंकं कुहां वल
येँ (सन्ध्या टाइम्स)/नेपाल स्टक एक्सचेन्जय् शेयर कारोबारय् लगातार वयाच्वंगु र्हासया कारणं म्हिगः नेप्से परिसूचक ७०० अंकं क्वय् कुहां वंगु दु। कारोबार शुरु जूसां निसें नेप्से कुहां वंगु वनं तुं जुल। न्हापा लिपा थें थुगु वालय् नं कारोबारया शुरुइ हे नेप्से कुहां वःगु दु। नेप्सेय् म्हिगः कारोबार जूगु दक्व धइथें वाणिज्य बैंकया शेयर भाः कुहां वयेवं प्रत्यक्ष रुपं थुकिया लिच्वः नेप्से परिसूचकय् लाः वंगु खः ।
म्हिगः नं दकलय् अप्वः स्टायण्डर्ड चार्टर्ड बैंकया शेयरय् प्रति कित्ता १६०/- तका कुहां वःगु दुसा नविल बैंकया शेयरय् प्रति कित्ता १००/- तका दां कुहां वल। शेयर कारोबारय् वयाच्वंगु लगातारया र्हासं नेप्से ८ दशमलव ८८ अंकं कुहां वयाः ६९३ दशमलव ३४ अंकय् थ्यंगु दु। सेन्सेटिभ नं ३ दशमलव १३ अंकं कुहां वःगु दुसा फ्लोट शून्य दशमलव ९९ अंकं कुहां वल ।
उपसूचकय् वीमा समुह छगू जक ५ दशमलव २१ अंकं थहां वनाः ६९३ दशमलव ९२ अंकय् थ्यंगु दु। दक्वं वाणिज्य बैंकया कारोबारय् वःगु र्हासया कारणं थुगु समुह १३ दशमलव ७ अंकं कुहां वयाः ७३१ दशमलव २४ अंकय् थ्यन। विकास बैंक समुह कारोबार नं ८ दशमलव १ अंकं कुहां वयेवं ७०३ दशमलव ३३ अंकय् थ्यंगु दु। जलविद्युत समुह नं ११ दशमलव ८२ अंकं कुहां वयाः ८६४ दशमलव ८८ अंकय् थ्यन। फाइनान्स समुह ५ दशमलव ९६ अंकं कुहां वयाः ६६४ दशमलव २६ अंकय् थ्यंगु दु ।
शेयर कारोबारय् वयाच्वंगु र्हासया कारणं यानाः कारोबार कम्पनी व दांया कारोबार नं म्हो जुजुं वंगु दु। छन्हु न्ह्यःया ख्वीगु कम्पनीया झिंनिगू करोड बराबरया कारोबार जूगु खःसा म्हिगः न्यय्खुगू कम्पनीया च्यागू करोड गुइगुंगू लाख स्वीप्यद्वः तका दां बराबरया छगू लाख झिंगुद्वः निसः व न्हय्खुगु कित्ता शेयर कारोबार जुल ।
शेयरया भाः कुहां वंसां स्टायण्डर्ड चार्टर्डं दकलय् अप्वः छगू करोड चय्छगू लाख नीच्याद्वः तका दांया कारोबार यात ।
