उपराष्ट्रपतिं जनतां न्ववाइगु भासं सपथ कासाः बांलाइ : गजुरेल
एकीकृत नेकपा (माओवादी)या सचिव सीपि गजुरेलं उपराष्ट्रपति परमानन्द झां खस व हिन्दी भासं स्वयां नं मैथिली, अवधि वा जनतां न्ववाइगु भासं सपथ कासाः बांलाइगु बिचाः प्वंकादीगु दु ।
क्रान्तिकारी पत्रकार संघ मकवानपुरं मंगलवाः हेटौंडाय् याःगु पत्रकार नापलायेगु ज्याझ्वलय् पत्रकारतय्सं न्यंगू छगू न्ह्यसःया लिसःलय् वयेकलं सर्वोच्च अदालतं हानं खस भासं सपथ कायेमाःगु फैसलाय् माओवादीया सहमति मदुगु धयादिसें खस व हिन्दी भासं स्वयाः उपराष्ट्रपतिं मैथिलि, अवधि व जनतां न्ववाइगु भासं सपथ कासाः बांलाइगु धयादिल ।
अथेहे ज्याझ्वलय् न्ववानादिसें वयेकलं उपराष्ट्रपति झां नं हिन्दी भासं सपथ काःगु नं गती जूगु धयादिल । वयेकलं उपराष्ट्रपतिं राजनीमा बीवं समस्याया समाधान मजूगु धयादिसें सर्वोच्च अदालतया आदेश पालना यायेगुया विकल्प मदु धयादिल ।
सिन्धुली व मकवानपुरय् निन्हुन्यंकया कार्यकर्ता प्रशिक्षण यायेत सोमवाः हेटौंडा थ्यंकादिम्ह माओवादी सचिव गजुरेलं माओवादीं शुरु याःगु आन्दोलनया दबाबं ईलय् हे संविधान निर्माण जुइगु दाबी यानादिल । वयेकलं वर्तमान सरकारं शान्ति प्रकृया स्यंकेत स्वयाच्वंगु द्वपं बियादिल ।
