ल्वाभः सहित लडाकुत पिहांवःगु शान्ति सम्झौता विपरीत : ल्याण्डग्रीन

अनमिन प्रमुख करिन ल्याण्डग्रीनं कपिलवस्तुइ सोमवाः एकीकृत नेकपा (माओवादी)या लडाकुत क्यान्टोन्मेन्ट पाखें ल्वाभः सहित पिने पिहावंगु घटनां शान्ति सम्झौताया गम्भीर उल्लंघन जूगु खँ धयादीगु दु ।

पूर्वाञ्चल भ्रमणया झ्वलय् मंगलवाः विराटनगरय् मानवअधिकारकर्मी व नागरिक समाजया प्रतिनिधित नाप खँल्हाबंला यानादिसें माओवादी जनसेनां ल्वाभः सहित शिविर पिने पिहावंगु घटना शान्ति सम्झौता विपरीत जूगु धयादिसें माओवादी जनसेना वर्दी व ल्वाभः सहित पिने वयेमदुगु धयादिल । वयेलकं शिविर सुरक्षाया निंतिं तयातःगु ल्वाभः शिविर पिने यंकेमदुगु धयादिल ।

सोमवाः दाङं रुपन्देही वयाच्वंगु ईलय् गुपू ल्वाभः सहित झिंगुम्ह माओवादी लडाकुतय्त प्रहरीं कपिलवस्तुया पिपरय् ज्वंगु खः ।