खस भासं सपथ कायेगुया विकल्प मदु : खनाल
नेकपा (एमाले)या अध्यक्ष झलनाथ खनालं उपराष्ट्रपति परमानन्द झां खस भासं सपथ कायेगुया विकल्प मदुगु खँ धयादीगु दु ।
मंगलवाः उद्योग वाणिज्य संघ तुल्सीपुरं याःगु ज्याझ्वलय् अध्यय खनालं उपराष्ट्रपतिं हिन्दी भासं सपथ काःगु दुर्भाग्यपूर्ण जूगु टिप्पणी यानादिसें वयेकलं सर्वोच्च अदालतया आदेश पालना यासें खस भासं हे सपथ ग्रहण यायेमाः धयादिल ।
अथेहे ज्याझ्वलय् वयेकलं राष्ट्रपति थंज्याःगु सम्मानीत पदयात विवादीत दयेके मज्यूगु खँय् बः बियादिसें आःया अवश्यकता संविधान निर्माण व शान्ति प्रकृया जूगु धयादिल । वयेकलं थुकीयात पूवंकेत एमाले, कांग्रेस व माओवादीया एकता अपरिहार्य जूगु धयादिसें स्वंगू दलया एकता मजूसाः देशय् दुर्घटना जुइफूगु ख्याच्वः बियादिल ।
वयेकलं संवैधानि समितिया सभापति पद चयन यायेत दलत दथुइ विवाद दुसां थुकीयात सहमतिया आधार हे समाधान यायेगु धयादिल ।
अथेहे ज्याझ्वलय् एमाले महासचिव ईश्वर पोखरेलं एमाले नेतृत्वया सरकार सहमतिया सरकार जूगु धयादिसें थ्व सरकार शान्ति प्रकृयायात निष्कर्षय् थ्यंकेत गठन जूगु धयादिल । वयेकलं शान्ति प्रकृयायात निष्कर्षय् थ्यंके मफुसाः थ्व सरकारया छुं अर्थ मदइगु बिचाः प्वंकादिल ।
