तमलोपाया नेतातय्सं प्रधानमन्त्री नापलात
उपराष्ट्रपतिया सपथ ग्रहणया विषययात कयाः तराई-मधेश लोकतान्त्रिक पार्टीया नेतातय्सं प्रधानमन्त्री माधवकुमार नेपालयात नापलानादीगु दु ।
मंगलवाः प्रधानमन्त्री निवास बालुवाटार वनाः तमलोपाया अध्यक्ष महन्त ठाकुर, नेता हृदयेश त्रिपाठीं सपथ ग्रहण बारे निकास मालेत इनाप यानादीगु खः । अथेहे तमलोपाया नेतातय्सं सर्वोच्च अदालतं खस भासं हे सपथ कायेमाःगु निर्णय प्रति आपत्ति प्वंकादीगु खः ।
खँल्हाबंलाया झ्वलय् प्रधानमन्त्री नेपालं मन्त्रीपरिषदं उपराष्ट्रपतियात आःयात खस भासं सपथ कायेत इनाप यायेधुंकूगु खँ धयादिसें लिपाः संविधान संशोधन यायेधुंकाः न्ह्याःगु भासं सपथ कासां ज्यू धयादिल । नापं वयेकलं निकास मालेत मेमेगू दल नाप सहलह यायेगु नं प्रतिबद्धता प्वंकादीगु खः ।
सर्वोच्च अदालतं भदौ ७ गते उपराष्ट्रपितं न्ह्यन्हु दुने खस भासं सपथ ग्रहण मयासाः वयेकया पद निष्कृय जुइगु फौसला याःगु खः ।
