भारत भ्रमण सफल जूगु नीनिगू दलया निष्कर्ष
प्रधानमन्त्री माधवकुमार नेपालं थःगु न्यान्हुन्यंकया भारत भ्रमणया बारे सत्ता साझेदार नीनिगू दलनाप सहलह यानादीगु दु । प्रधानमन्त्री व मन्त्रिपरिषदया ज्याकूथी सोमवाः जूगु बैठकय् प्रधानमन्त्री नेपालं थःगु भारत भ्रमणया बारे दलतय्त जानकारी बियादीगु खसाः नीनिगू दलं थुगु भ्रमण सफल जूगु निष्कर्ष पिकाःगु खः ।
सर्वदलीय बैठक धकाः प्रधानमन्त्री नेपालं बैठक सतादीगु खसां प्रमुख प्रतिपक्षी दल एकीकृत नेकपा (माओवादीं) धासाः बैठकय् ब्वति मकाः । बैठकय् ब्वति काःगु दलतय्सं हिलावंगु अवस्थाय् न्हूगु ढंगं सहमतिया साथ न्ह्यावनेमाःगु निष्कर्ष नं पिकाःगु खः । अथेहे शान्ति प्रकृयायात तार्किक निष्कर्षय् थ्यंकेत सहमति व सहकार्य यानाः वनेमाःगु खँय् दलतय्सं बः ब्यूगु दु । बैठकय् व्यवस्थापिका संसदया अवरोध, संवैधानिक समितिया सभापति चयन लगायत विषयलय् नं सहलह जूगु खः ।
