जनजातियाके वंशाणु विविधता !
येँ (सन्ध्या टाइम्स)/ नेपाःया आदिवासी जनजातिया सांस्कृतिक व जैविक विविधता जक मखु वंशाणु विविधता नं लूगु दु। नेपाःया हे छुं छुं आदिवासी जातियाके थज्याःगु वंशाणु विविधता लूगु खः ।
नेपाःया जनजातिया जीनया बारे अनुसन्धान यानाच्वंम्ह डा. नन्दबहादुर सिंह व वय्कःया जापानी ग्वाहालि पुचलं चिडिमार जातियाके एड्सया वंशाणु लुइकूगु खः।
अथे हे उगु पुचलं राउटे जातियाके मलेरियाया वंशाणु लुइकूगु दु। नेपालय् मलेरिया वंशाणु न्हापा नेपाःया हे आदिवासी थारुतय्त जक दुगु खँ वयाच्वंगु खःसा डा. सिंहं यानादीगु अनुसन्धान लिपा थारुतय्के स्वयां नं अप्वः मलेरिया प्रतिरोधात्मक क्षमता राउटेतय्के दुगु दावी वय्कलं यानादीगु दु ।
वय्कलं बियादीगु जानकारी कथं न्हापा छम्ह इटालीयाम्ह वंशाणु विशेषज्ञं सन् १९८३इ नेपाःया थारुतय्के मलेरिया वंशाणु दुगु लुइकूगु खः ।
अथे हे नेपाःया मेगु जाति चेपाङ व मुन्डा जातियाके 'हेपाटाइटिस बी'या वंशाणु लूगु दावी नं वय्कलं यानादीगु दु।
वय्कलं कनादी कथं थ्व अध्ययन यायेगु झ्वलय् थीथी खुगू आदिवासी जनजातिया जक अध्ययन जुयाच्वंगु दुसा आः ख्वीगू जनजातिया अनुसन्धान यायेगु कुतः जुयाच्वंगु दु।
नेपाःया आदिवासीयाके अय्लाः पचे याये फइगु वंशाणु व क्यान्सरं बचे जुइगु वंशाणु बारे अनुसन्धान न्ह्याकाच्वनागु जानकारी नं वय्कलं बियादीगु दु ।
