म्हिगः नं नेप्से कुहां वल
येँ (सन्ध्या टाइम्स)/नेपाल स्टक एक्सचेन्जय् नेप्से परिसूचक कुहां क्रम अझं दिउगु मदुनि। न्हापा लिपा थें थुगु वालय् नं कारोबारया शुरुइ हे नेप्से कुहां वल । नेप्सेया लिसें शेयर ल्याः व दांया कारोबार नं कुहां वःगु दु। स्टायण्डर्ड चार्टर्ड व नविल बैंकया शेयरय् गाक्कं कुशां वयेवं थुकिया लिच्वः नेप्सेय् लाःवंगु खः। स्टाउण्डर्डया १७५/- व नविलया शेयरय् १०५/- कुहां वल ।
थ्व निगू बैंकया शेयरय् गाक्कं कुहां वयेवं म्हिगः नेप्से नं ७ दशमलव ६ अंकं कुहां वयाः ७०२ दशमलव २२ अंकय् थ्यंगु दु। अथे हे सेन्सेटिभ नं २ दशमलव ५२ अंकं व फ्लोट शून्य दशमलव ६९ अंकं कुहां वल ।
नेप्सेया प्रभाव थुकिया उपसूचकय् नं लाःगु खनेदत। अप्वः थें कारोबार कुहां वनेवं वाणिज्य समुह ९ दशमलव ६७ अंकं कुहां वयाः ७४४ दशमलव ९४ अंकय् थ्यन। थ्व हे अनुपातय् विकास बैंकया नं कारोबार कुहां वयेवं थुगु समुह नं ९ दशमलव ३३ अंकं कुहां वयाः ७११ दशमलव ४३ अंकय् थ्यंगु दु ।
जलविद्युत समुह नं २ दशमलव ९२ अंकं कुहां वयाः ८७४ दशमलव ७ अंकय् थ्यन। फाइनान्स समुह ३ दशमलव ६९ अंकं कुहां वयाः ६६९ दशमलव ९६ अंकय् व विमा समुह ७ दशमलव १ अंकं कुहां वयाः ६३४ दशमलव ७१ अंकय् थ्यन।
ख्वीगु कम्पनीया छगू लाख ख्वीन्याद्वः स्वसः व ख्वीनिगू कित्ता शेयर पाखें झिंनिगू करोड न्हय्खुगू लाख व न्यय्द्वः तका दां कारोबार जुल। कारोबार जूगु कम्पनीत मध्ये दांया ल्याखं सिटिजन्स बैंक इन्टरनेशनल लिं. दकलय् अप्वः निगू करोड न्हय्गू लाख व गुइगुद्वः तका दांया कारोबार याःगु दु।
रिलायबल फाइनान्सं अप्वः कमे यायेत ताःलाःगु दुसा लुम्बिनी बैंकं दकलय् अप्वः गुमे याःगु दु ।
