विशेष सुरक्षा योजनाया विरोध अर्थहीन : गृहमन्त्री
गृहमन्त्री भीम रावलं तराईलय् शान्ति सुरक्षा कायम याये चाहेमजुपिं तत्त्वतय्सं विशेष सुरक्षा योजनायात मधेशीतय्त दमन यायेगु धकाः प्रचार यानाच्वंगु द्वपं बियादिल ।
प्रेस चौतारी मोरङं सोमवाः विराटनगरय् ग्वसाःग्वःगु पत्रकार सम्मेलनय् गृहमन्त्री रावलं राष्ट्रिय एकता, अखण्डता, सदभाव स्यंकेत स्वइपिं आपराधितय् ज्या नियन्त्रण यायेत विशेष सुरक्षा योजना लागू यायेत्यना:गु धयादिल ।
वयेकलं विशेष सुरक्षा योजनां मधेशय् दमन यायेत स्वःगु टिप्पणी सुनां याइसाः उकीया छुं अर्थ मदु धयादिल । सरकारय् दुथ्याःगु व सरकार पिनेया दलतय् समेत मंकाः सहमतिया आधारय् सरक्षा योजना हःगु धयादिसें गृहमन्त्री रावलं सुरक्षा योजनां हत्या, अपहरण, बलत्कार, फिरौती थंज्याःगु जघन्य अपराध नियन्त्रण जुइगु दाबी यानादिल ।
गृहमन्त्री रावलं राजनीतिक नां बिया अपराध याइपिनिगु पुचःयात नं कडा रुपं नियन्त्रण यायेगु धयादिल । दल व उमिगु भातृसंगठनया गैर कानूनी क्रियाकलाप नियन्त्रण, गुण्डागदी विरुद्धया कारवाहीलय् सुरक्षा निकायं विशेष ध्यान बीगू धयादिल । वयेकलं अपराध याइपिं न्ह्यागु हे पार्टीया नेता वा कार्यकर्ता जुसां अज्याःपिंत सजाय बित सम्बन्धित निकाययात निर्देशन बीधुंकाःगु खँ धयादिल ।
