सर्वोच्च क्षेत्राधिकार पिने वनः : उपराष्ट्रपति झा
उपराष्ट्रपति परमानन्द झां सपथ प्रकरणय् सर्वोच्च अदालत क्षेत्राधिकार पिने वंगु दाबी यानादीगु दु ।
सोमवाः सुथय् येँय् पाखें प्रशारण जुइगु छगू रेडियोय् अर्न्तवार्ता बियादिसें उपराष्ट्रपति झां सर्वोच्चं क्षेत्राधिकार पिने वनाः अनावश्यक विवाद खडा यायेत स्वःगु द्वपं बियादिल । वयेकलं अन्तरिम संविधानया धारा ३६ ज २लय् उपराष्ट्रपति सीगु, राजीनामा ब्यूगु व महाभियोग लगेजूगु अवस्थाय् जक पद खाली व मुक्त जुइफइगु व्यवस्था दुगु खँ न्ह्यथंनादिसें हानं सपथ मकासाः उपराष्ट्रपतिया पद क्रियाशील मजुइगु सर्वोच्चया निर्णय क्षेत्राधिकार अनुरुप मजूगु जिकिर यानादिल ।
छवाःया दुने हानं खस भासं सपथ कायेत सर्वोच्च अदालतं ब्यूगु आदेश बारे रेडियो कान्तिपुरयात सोमवाः ब्यूगु अर्न्तवार्तय् वयेकलं राष्ट्रपतिं थुकीया बारे लिखित आदेश ब्यूसा जक छुं यायेफइगु प्रतिक्रिया बियादिल ।
सर्वोच्चं सोमवाः उपराष्ट्रपति झा नं न्ह्यन्हु दुने खस भासं सपथ मकासाः वयेकया पदीय जिम्मेवारी स्वतः निष्कृय जुइगु ठहर याःगु खः ।
