एमाले व कांग्रेसया असन्तुष्ट पक्ष सहित राष्ट्रिय सरकार : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' एमाले व कांग्रेसया असन्तुष्ट पक्ष सहित राष्ट्रिय सरकार गठन यायेगु खँ धयादीगु दु ।
क्रान्तिकारी पत्रकार संघं बाँकें सोमवाः ग्वसाःग्वःगु पत्रकार सम्मेलनय् अध्यक्ष प्रचण्डं माओवादीया नेतृत्वय् राष्ट्रिय सरकार दयेकीगु पहल जुयाच्वंगु धयादिसें एमाले व कांग्रेस दथुइ असन्तुष्ट पक्षयात कया राष्ट्रिय सरकार गठन यायेगु धयादिल । वयेकलं वर्तमान राजनीतिक गतिरोध अन्त्य यायेत एमाले व कांग्रेस नाप याकनं हे सहलह यायेगु नं धयादिल ।
माओवादीया संयुक्त राज्य स्तरीय अगुवा कार्यकर्ता प्रशिक्षणया निंतिं बाँके थ्यकादिम्ह अध्यक्ष प्रचण्डं पत्रकार सम्मेलनय् नीनिगू दल दुने नागरिक सर्वोच्चताया विषयलय् सहलह मजूसाः एमाले नेतृत्वया सरकार क्वदला माओवादी नेतृत्वया सरकार गठन जुइगु दाबी यानादिल । वयेकलं नागरिक सर्वोच्चताया विषयलय् सदनय् हःगु प्रस्तावय् सहलह यायेमबीया शान्ति प्रकृया व संविधान निर्माण प्रकृया प्रति गम्भिर षड्यन्त्र याःगु धयादिल । वयेकलं नागरिक सर्वोच्चताया पक्षय् शान्तिपूर्ण ढंगं सुनुवाई मजुसाः देशय् स्वक्वःगू जनआन्दोलन यायेगु ख्याच्वः नं बियादिल ।
अथेहे वयेकलं प्रधानमन्त्री नेपालया भारत भ्रमणयात भारतीय अधिकारीतय्सं च्यूता मब्यूगुलिं भ्रमण असफल जूगु धयादिसें भ्रमणयात कामचलाउ जूगु टिप्पणी यानादिल ।
