बस फाटापुला खुम्ह सित, मेगू दुर्घटनाय् निम्ह सित
दमौलीं भोर्लेटार पाखे वनाच्वंगु यात्रुवाहक बस व्यास नगरपालिका ९ खहरेय् सोमवाः न्हिनय् फाटापुला खुम्ह यात्रुत सीगु दु । दुर्घटनाय् लनाः न्याम्ह घटनास्थलय् हे मदुगु खसाः छम्हेसित वासः याकेत दमौली अस्पतालय् यंकेगु झ्वलय् मदुगु खः ।
क्षमता स्वयां अप्वः यात्रुत तयाहःगु बस अनियन्त्रित जुयाः सतकं १ सय ३० मिटर मादि खुसी किनारय् कुतुंवंगु खः । दुर्घटनाय् लानाः मेपिं खुइनिम्ह स्वयां अप्व यात्रुत घाःपाः जूगु दु । गम्भीर घाःपाः जुपिं झिंखुम्हेसित वासः याकेत पोखर यंकूगु दु ।
अथेहे पूर्वपश्चिम महेन्द्र राजमार्ग अर्न्तगत हेटौंडा नारायणगढ सतक खण्डय् सोमवाः सुथय् झिंछताः ईलय् निगः बस ठक्कर नयाः निगलं बसया चालक सीगु दुसाः नीखुम्ह यात्रुत घाःपाः जूगु दु । घाःपाः मध्ये न्याम्हेसिया अवस्था चिन्ताजनक जूगु खँ सिदुगु दु । उमित वासः याकेत भरतपुर यंकूगु दुसाः मेपिं सामान्य घाःपा जूपिंत स्थानीय हेटौंडा अस्पतालय् वासः याकातःगु दु ।
हेटौंडा पाखें नारायणगढ वनाच्वंगु ना. ३. ख. ४८६४या बस व ना. ३. ख. १२८३ नम्बरया बस हेटौंडाया बस्तीपुरय् ठक्कर नयाः दुर्घटनाग्रस्त जूगु खः ।
