उपराष्ट्रपतियात हानं खस भासं सपथ कायेत निर्देशन
सपथ मकासाः कार्यभार निष्कृय जुइगु ठहर
सर्वोच्च अदालतया पूर्ण इजलासं उपराष्ट्रपति परमानन्द झायात न्ह्यन्हुया दुने हानं खस भासं सपथ कायेत निर्देशन ब्यूगु दु ।
बहस सिधेवं आइतवाः सर्वोच्च अदालतया पूर्ण इजलासं याःगु फैसलां वयेकयात न्ह्यन्हु दुने सपथ मकासाः वयेकया कार्यभार निष्कृय जुइगु धासें खस भासं सपथ मकाःगु खण्डय् पदतय् च्वने मिलेमजूगु ठहर याःगु दु ।
वयेकलं खस भासं हानं सपथ मकासाः पदपाखें चीकेत माग यासें संचारकर्मीत नवराज न्यौपाने व विष्णुप्रसाद वास्तोलां सर्वोच्च अदालतय् रिट दायर याःगु खः । रिटया पक्षय् अधिवक्ता टीकाराम भट्टराई, बालकृष्ण न्यौपाने, रामचन्द्र शर्मा, कुमार रेग्मी व विपक्षय् हिम्मत सिंह, मिथिलेशकुमार सिंह, सीताराम अग्रवाल लगायत अधिवक्ततय्सं बहल याःगु खः ।
सर्वोच्च अदालतं थ्वस्वयां न्ह्यया निर्णययात हे निरन्तरता बीया आइतवा: निर्णय याःगु खः । अथेहे सरकारं नं उपराष्ट्रपति झायात खस भासं शपथ कायेत इनाप यायेधुंकूगु दु ।
