'सुरक्षा नीतिया विरोध याइपिं अपराधीत खः'
गृहमन्त्री भीम रावलं सरकारं गु नं हालतं विशेष सुरक्षा नीति लागु याना हे त्वतीगु खँ धयादीगु दु ।
आइतवाः सुरक्षा सम्बन्धी क्षेत्रीय सम्मेलनया विराटनगरय् उल्लेज्या यानादिसें गृहमन्त्री रावलं थ्व नीति अपराधी विरुद्ध जूगु धयादिसें थुकीया सुनां विरोध याइसाः व नं अपराधी हे खः धयादिल । वयेकलं सुरक्षा नीतियात इमान्दारीतापूर्वक कार्यान्वयन यायेत पूर्वया सुरक्षा प्रमुखतय्त निर्देशन बियादिल ।
वयेकलं सरकारं जनतायात शान्तिपूर्ण रुपं म्वाये दइगु अधिकार रक्षा यायेत विशेष सुरक्षा रणनीति न्ह्यने हःगु धयादिसें थुकी प्रतिपक्षी माआवादीया नं सहमति दुगु धयादिल । वयेकलं आः सरकारं देयन्यंकया सच्छि व गुंगू थीथी सशस्त्र पुचःया बारे अध्ययन यानाच्वंगु व उकी मध्ये अधिकांश अपराधिक पुचः दुगुलिं अज्याःगु व्यक्ति व पुचःयात कानुनया दायराय् हयातुं त्वतेगु दाबी यानादिल ।
अथेहे ज्याझ्वलय् गृहराज्यमन्त्री मोहमद रिजमान अन्सारीं जातीय मुक्तिया नांमय् जुयाच्वंगु आन्दोलन साम्प्रदायीकता स्यंकेगु व देय् विखण्डन यायेगु गतिविधि यासाः उमित सरकारं मत्वतीगु धयादिल ।
ज्याझ्वलय् गृहसचिव गोविन्द कुसुम, नेपाल प्रहरीया महानीरक्षिक रमेश चन्द ठकुरी, सशस्त्र प्रहरीया प्रमुख सनतकुमार बस्नेत, रष्ट्रिय अनुसन्धान विभागया प्रमुख असोकदेव भट्ट लगायत पूर्वया झिंखुगू जिल्लाया प्रमुख जिल्ला अधिकारी, सशस्त्र जनपथ प्रहरी प्रमुख, राष्ट्रिय अनुसन्धानया प्रमुख व गृहमन्त्रलाया पदाधिकारी सहित च्येम्हसि नं ब्वति काःगु खः ।
