प्रधानमन्त्रीया भारत भ्रमण उपलब्धिहीन : यादव
प्रधानमन्त्रीया भारत भ्रमण निरन्तरता बाहेक उपलब्धिमुकल मजूगु खँ मधेशी जनअधिकार फोरमया अध्यक्ष उपेन्द्र यादवं धयादीगु दु । वयेकलं पुलांगु सरकारं तय याःगु खँ हे वर्तमान प्रधानमन्त्रीं निरन्तरता ब्यूगु दाबी यानादिसें नेपाःया हितय् यायेमाःगु मुख्य खँत यायेमफुगु टिप्पणी यानादिल ।
पार्टी विभाजन लिपा संगठन सुदृढिकरणया निंतिं सर्लाही थ्यंकादिम्ह यादवं आइतवाः सलेमपुरय् जूगु पत्रकार सम्मेलनय् भारत नापया व्यापार घाटा म्हो यायेत सरकारं ठोस प्रस्ताव तयेमफुगु द्वपं बियादिल । अथेहे वयेकलं जनतां सतकय् ल्ह्वनाच्वंगु सीमा अतिक्रमण व सन् १९५०या सन्धिया मुद्दात प्रधानमन्त्रीं भारत भ्रमणय् मल्ह्वंगु धासें कूंखिनादिल ।
पुलांम्ह परराष्ट्रमन्त्री नं जुयादिम्ह यादवं प्रधानमन्त्रीया भारत भ्रमणय् परराष्ट्रमन्त्री सुजाता कोइराला मवंगु धइगु कुटनीतिक मर्यादा विपरीत जूगु धयादिल । वयेकलं अन्तरीक विवादयात कुटनीतिक ज्याय् स्वायेगु चरम गती जूगु टिप्पणी यानादिल ।
