प्रधानमन्त्री व कांग्रेस नेतात दथुइ सहलह
प्रधानमन्त्री माधवकुमार नेपालं अवरुद्ध व्यवस्थापिका संसद सुचारु यायेत व संवैधानिक समितिया सभापति चयनया विषयलय् कांग्रेसया वरिष्ठ नेतात नाप सहलह यानादीगु दु ।
सिंहदरवारय् च्वंगु प्रधानमन्त्रीया ज्याकूथी आइतवाः जूगु सहलहल् निकास मालेगु निंतिं गुकथं न्ह्याः वनेगु बारे सहलह जूगु खः । अथेहे निकास मालेत गुलितक लचकता क्यनेगु धइगु विषयलय् नं सहलह केन्द्रीत जूगु खः ।
कांग्रेस नेतात नाप जूगु खँल्हाबंलाय् प्रधानमन्त्री नेपालं थःगु भारत भ्रमणया बारे नं जानकारी बियादीगु खः । वयेकलं भारत भ्रमण तसकं फलदायी व सकारात्मक जूगु जानकारी कांग्रेस नेतातय्त बियादीगु खः ।
प्रधानमन्त्री नेपाल नापया सहलह लिपा संचारकर्मीत नाप खँल्हाबंला यानादिसें कांग्रेस संसदीय दलया नेता रामचन्द्र पौडेलं प्रधानमन्त्री नेपालया भारत भ्रमण, संवैधानिक समितिया सभापति चयन यायेगु व लिपांगु राजनीतिक घटनाक्रम लगायतया बारे सहलह जूगु जानकारी बियादिल ।
