'सुजाताया खँ ल्हाये गात'
येँ (सन्ध्या टाइम्स)/ प्रधानमन्त्री माधव नेपालया भारत भ्रमणय् परराष्ट्र मन्त्री सुजाता कोइराला मवंगु खँ मल्ह्वनेत कांग्रेस सभापति गिरिजाप्रसाद कोइरालां पार्टीया केन्द्रीय नेतातय्त निर्देशन बियादीगु दु। थौं सुथय् महाराजगञ्जया थःगु हे छेँय् कौला सःतुसें वय्कलं उगु निर्देशन बियादीगु खः।
सुजाताया प्रशंग गौण विषय खः धासें वय्कलं उगु निर्देशन बियादीगु खः ।
कौला ज्याझ्वः धाःसां अनौपचारिक कथं केन्द्रीय समितिया बैठक थें न्ह्याःगु उगु मुँज्याय् नेतातय्त निर्देशन बीगु झ्वलय् सभापति कोइरालां फागुन मसान्त तकया दुने महाधिवेशन क्वचायेकेगु कथं तयारी यायेत नं निर्देशन बियादीगु खः।
वय्कलं उगु इलय् आःयात फुक्कं विषय थाति तयाः महाधिवेशनय् न्ह्यायेमाःगु खँ कनादिसें उकिया तयारी यायेत नं निर्देशन बियादीगु दु ।
निर्वाचनपाखें पार्टीया सभापति निर्वाचित यायेगु प्रावधानयात अस्वीकार यासें वय्कलं सभापतियात कमजोर याइगु विधान मदयेकेत नं निर्देशन बियादिल।
वय्कलं महाधिवेशन लिपा थः एकल सभापतिया पक्षय् दु धासें महाधिवेशनं पार्टीयात अझ बल्लाकीगु बिचाः नं प्वंकादीगु खः ।
तर केन्द्रीय नेतातय्सं धाःसा कोइरालाया उगु धापूयात अस्वीकार यासें पार्टी मंकाः नेतृत्वय् वनेमाःगु खँय् बः बिउगु खँ उगु कौला ज्याझ्वलय् दुथ्याःम्ह छम्ह नेतां कनादीगु दु।
सभापति कोइरालां सःतूगु कौला ज्याझ्वलय् वय्कःया म्ह्याय एवं परराष्ट्र मन्त्री सुजाता कोइराला धाःसा उपस्थित मजू ।
