अधिवेशन मयायेत थारुतय्त ख्याच्वः
येँ (सन्ध्या टाइम्स)/जिल्ला प्रशासन ज्याकू दांगं थरुहट स्वायत्त राज्य परिषदं आइतवाः व सोमवाः कुन्हु दांगया देउखुरी यायेत्यंगु थरुहट सेनाया न्हापांगु अधिवेशनया प्रचार प्रसार मयायेत निर्देशन बिउगु दु ।
दांगया प्रमुख जिल्ला अधिकारी ऋषिराम ढकालं छगू प्रेस विज्ञप्ति पिथँसें थरुहट सेनायात ग्वाहालि जुइ कथं प्रचार प्रसार मयायेत निर्देशन बिउगु खः ।
विज्ञप्तिइ प्रशासनया आदेशयात सुनां नं उल्लंघन यात धाःसा उमित कानून कथं कारवाही यायेगु ख्याच्वः नं बियातःगु दु।
दांग जिल्ला प्रशासन कार्यालयया थज्याःगु आदेश लिपा थरुहटया कार्यकर्तात धाःसा तम्वःगु दु ।
थरुहटया नेतातय्सं प्रशासनया थ्व आदेश विशेष सुरक्षा योजना रणनीति कथं वःगु व थुकिं थःपिंत क्वत्यलेत स्वःगु धकाः विश्लेषण याःगु दु ।
