छवाःया कारोबार च्वय् नेप्से क्वय्
येँ (सन्ध्या टाइम्स)/नेपाल स्टक एक्सचेन्जय् जूगु समग्र छवाःया शेयर कारोबारय् नेप्से कुहां वंगु दु। थुगु वाः स्वयां न्ह्यःया कारोबारय् २३ अंकं थहां वंगु नेप्से थुगु वालय् धाःसा शेयर लगानीकर्तातय्त हाकनं छक्वः निराश यासें १२ दशमलव १३ अंकं कुहां वंगु दु ।
थुगु वालय् ७२१ दशमलव ९५ अंकं कारोबारशुरु जुयाः वाःया लिपांगु न्हि ७०९ दशमलव ८२ अंक थ्यंकाः कारोबार बन्द जूगु खः। थ्व छवाःया दुने नेप्सेय् मुक्कं चय्न्यागू कम्पनीया ५४७७ कारोबारं च्यागू लाख खुइन्हय्द्वः व सछिगू कित्ता शेयर न्याये-मी जुयाः ख्वीस्वंगू करोड ख्वीन्यागू लाख न्हय्प्यद्वः दांयाक कारोबार जुल। छवाः न्ह्यः ४२९८ कारोबारं खुगू लाख पीनिद्वः व च्यासः कित्ता शेयर न्याये-मी जुयाः स्वीच्यागू करोड गुइस्वंगू लाख स्वीच्याद्वः दांया कारोबार जूगु खः ।
थ्व ल्याखं वंगु वालय् जूगु कारोबारया तुलनाय् थ्व वालय् जूगु कारोबारय् ६३ दशमलव ५० प्रतिशतं वृद्धि जुगु दु।
थ्व वालय् नेप्सेय् जूगु कूल कारोबारय् 'क' वर्गया कम्पनीया जक पीनिगू करोड न्हय्स्वंगू लाख तका बराबर दांया कारोबार जुल। थ्व नेप्सेय् जूगु कूल कारोबारया ६७ दशमलव १३ प्रतिशत खः ।
'क' वर्गया कम्पनीया कारोबार मापन याइगु सेन्सेटिभ इन्डेक्स नं वाःया न्हापांगु न्हिया तुलनाय् ४ दशमलव ३३ अंकं कुहां वनाः १९० दशमलव ३७ अंकय् थ्यंकाः बजाः बन्द जुल ।
थ्व वालय् दांया ल्याखं दकलय् अप्वः गुंगू करोड गुइस्वंगू लाख तकाया कारोबार याःगु लिधंसाय् स्टायण्डर्ड चार्टर्ड बैंक, निगू लाख झिंप्यद्वः कित्ता शेयर न्याये-मी जूगु लिधंसाय् नेशनल हाइड्रो पावर व च्यासः व चय्खुगू स्वसः व गुइनिगू कारोबारया लिधंसाय् बैंक अफ एशिया नेपाल न्ह्यःने लाःग दु।
थ्व वालय् विराटलक्ष्मी विकास बैंक व यूनाइटेड फाइनान्सया बोनस शेयर व सानिमा विकास बैंक व स्टायण्डर्ड फाइनान्सया हकप्रद शेयर नेपाल धितोपत्र बोर्डय् सूचीकृत जूगु दु ।
