कोइराला अधिकार सम्पन्न सभापतिया पक्षय्
नेपाली कांग्रेसया सभापति गिरिजाप्रसाद कोइरालां पार्टीयात सामूहीक नेतृत्वय् यंकेमज्यूगु तर्क तयादीगु दु । बुहपदीय प्रणाली अन्तर्गत सामूहीक नेतृत्वय् यंकेवलय् गुट उपगुट जुइगु व उकीं पार्टी विभतः जुइगु जुइगुलिं एकल नेतृत्व हे ठीक जूगु धयादिल ।
तीजया लसताय् महाराजगंजय् च्वंगु थःगु हे छेँय् पार्टीया केन्द्रीय दुजःतय् निंतिं ग्वसाःग्वःगु चियापान ज्याझ्वलय् वयेकलं बहुपदीय प्रणाली वंगु एमालेय् विवाद अप्वःगु दसू बियादिसें कांग्रेसय् अथे जुइ मबीगु धयादिल । वयेकलं पार्टी विधान संशोधन मस्यौदाप्रति असहमति प्वंकादिसें भावी सभापति विशेषधिकार सम्पन्न जुइमाःगु बिचाः प्वंकादिल । वयेकलं वर्तमान व्यवस्था थें सभापतियात विशेषधिकार दयेमाः धयादिल ।
चियापान ज्याझ्वलय् कोइरालं फागुन मसान्त दुने जुइगु पार्टीया झिंनिगूगु महाधिवेशन सम्पन्न यायेत ज्या शुरु यायेत नं निर्देशन बियादिल । परराष्ट्रमन्त्री सुजाता कोइराला भारत भ्रमणय् मवंगु विषयलय् छुं नेतातय्सं खँ ल्ह्वनेवं उकी विवाद मयायेत सभापति कोइरालां इनाप यानादिल । वयेकलं आः दक्वं ध्यान महाधिवेशनय् केन्द्रीत यायेमाःगुलिं चीचीधंगु खँय् मल्ह्वनेत नेतातय्त इनाप यानादिल ।
