अनिश्चितकालीन सिन्धुली बन्द
स्थानीय प्रशासनं जिल्लाय् शान्ति सुरक्षा बीमफुगु धासें उद्योग वाणिज्य संघया आव्हानय् आइतवाः सुथय् निसें अनिश्चितकालीन सिन्धुली बन्द जूगु दु । बन्दया कारणं यातायात नापं सदरमुकाम व नापसंया क्षेत्रया दक्वं पसः बन्द जूगु दु । बन्दया कारणं निजी व सार्वजनिक शिक्षण संस्थात नं चालेफुगु मदु ।
शनिवाः सिन्धुलीया सदरमुकाम सिन्धुलीमाढीलय् ल्याम्ह पुच:त दथुइ ल्वापू जुयाः बजाः आतंकित याःगु ईलय् तकं प्रशासन मौन जूगुलिं सुरक्षाया माग यासें संघं अनिश्चितकालीन बन्दया आव्हान याःगु खः । संघं सिन्धुली सदरमुकाम व जिल्लाय् शान्ति सुरक्षाया प्रत्याभूति जुइगु धकाः नेपाल सरकारं ग्यारेन्टी बीमाःगु, उच्श्रृंखल गतिविधि याइगु अपराधिक गुण्डातय्त अविलम्ब ज्वनेमाःगु ,शनिवाःया घटना लिपा बन्द जूगु पसःयात क्षगिपूर्तिया व्यवस्था यायेमा:गु, सिन्धुली सदरमुकामयात बन्द मुक्त जिल्ला घोषणाया माग पूमवं तल्ले बन्द जारी जुइगु खँ धाःगु दु ।
