भारत भ्रमण सफल / गैरघातक ल्वाभः वइगु : प्रधानमन्त्री
प्रधानमन्त्री माधवकुमार नेपालं भारत भ्रमण फलदायी जूगु दाबी यानादिसें जनपद व सशस्त्र प्रहरीया निंतिं आवश्यक गैरघातक ल्वाभः ह्येगु बारे भारतय् खँल्हाबंला जूगु धयादिल ।
न्यन्हुन्यंकया औपचारिक भारत भ्रमण क्वचायेकाः शनिवाः नेपाः लिहाझायादिम्ह प्रधानमन्त्री नेपालं त्रिभुवन अन्तर्राष्ट्रिय विमानस्थलय् पत्रकारत नाप खँल्हाबंला यानादिसें नेपाली जनताया सदभाव कयाः भारत भ्रमणय् वनाःगु व भारतं लिहांवयेगु ईलय् भारतीय जनताया सदभाव ज्वनाः लिहांवयाःगु धयादिल ।
प्रधानमन्त्री नेपालं भारतं स्वीनिगू अर्ब तकाया आर्थिक ग्वाहालि बीत सहमति प्वंकूगु हे सदभावया दसू जूगु धयादिल । वयेकलं नेपालय् लगानी यायेत भारतीय लगानीकर्तातय् इनाप यानाःगु व उपिं लागानी यायेत तसकं उतसाहित जूगु धयादिल ।
माओवादी अध्यक्ष पुष्पकमल दाहालं प्रधानमन्त्री नेपालया भारत भ्रमण इतिहासय् दकलये असफल जूगु धकाः यानादीगु टिप्पणी उचित मजूगु धयादिसें प्रधानमन्त्री नेपालं भारत भ्रमण लिपाः देशय् सरकार परिवर्तन जुइ धकाः याःगु हल्लाय् छुं सत्यता मदुगु धयादिल ।
बिरामी जूगु त्वःचिनाः भारत भ्रमण रद्द यानादिम्ह परराष्ट्रमन्त्री सुजाता कोइराला प्रधानमन्त्री नेपालायत लसकुस यायेत विमानस्थल थ्यंकादीगु खः ।
