नेपाः व भारत दथुइ वाणिज्य सन्धिलय् हस्ताक्षर
नेपाः व भारत दथुइ भारतया राजधानी न्हू दिल्ली शनिवाः वाणिज्य सन्धिलय् थप सुविधासहित नवीककरण सन्धि सम्झौताय् हस्ताक्षर जूगु दु ।
शनिवाः न्हू दिल्लीइ च्वंगु हैदराबाद हाउसय् जूगु सन्धिलय् नेपाःया पाखें वाणिज्य सचिव पुरुषोत्तम ओझा व वयेकया भारतीय समकक्षी राहुल खुल्लरलं हस्ताक्षर यानादीगु खः । उगु अवसरय् वाणिज्य व आपूर्ति मन्त्री राजेन्द्र महत्तो व भारतया विदेश मन्त्री एसएम कृष्णाया नं उपस्थिति दुगु खः ।
सन् १९९६लय् सम्पन्न वाणिज्या सन्धिलय् हरेक न्यादँलय् सन्धि नवीकरण यायेगु प्रावधानयात अप्वयेकाः न्ह्यदँ याःगु दु । सन्धिलय् अनधिकृत व्यापार दिकेगु बुँदा चीकाः नेपाःया हितय् दुगु मेगु झिंप्यगू बुँदा थप याःगु दु ।
सन्धिलय् भारतं नेपाः वइगु सामान हानं स्वंगूगु देशय् निर्यात यायेफइगु, भारतय् नेपाली सामान छ्वयेगु ईलय् भन्सार कर लगेमजुइगु लगायत बुँदात दुथ्याकातःगु दु ।
