सुजातायात संसदीय दलं हानं सतल
नेपाली कांग्रेस संसदीय दलं परराष्ट्रमन्त्री सुजाता कोइरालायात भारत भ्रमणया बारे स्पष्टिकरण बीत मंगलवाः हानं सःतुगु दु ।
संसदीय दलया शनिवाः च्वंगु बैठकय् उपस्थित मजूगु धासें सभासदतय्सं वयेकयात कारवाहीया माग याःगु खः । भारत भ्रमण रद्द याःगु बारे स्पष्टिकरण बीत संसदीय दलं शनिवाः सःतुगु खसां मन्त्री कोइरालां थः बिरामी जूगु धासें लिखित स्पष्टिकरण छ्वःगु खः ।
वयेकल बिरामी जूगु त्वःचिना लिखित स्पष्टिकरण छ्वयाः मेगू हे ज्याझ्वलय् ब्वति कायेत झायादीगु खः । बैठकय् सभासदत पूर्णबहादुर खड्का, गगन थापा लगायतं संसदीय दलं सःतुगु स्वयां महत्वपूर्ण ज्याझ्वः मेगू मजुइगु धासें मन्त्री कोइरालायात कारवाही यायेत माग याःगु खः ।
थ्वस्वयां न्ह्य: प्रधानमन्त्री माधवकुमार नेपालया भारत भ्रमणय् ब्वति मकाःगु धासें स्पष्टिकरण बीत नेपाली कांग्रेस संसदीय दलं सःतुगु बैठकय् परराष्ट्रमन्त्री सुजाता कोइराला उपस्थित जुयामदी ।
शनिवाः सुथय् कांग्रेस सभापति गिरिजाप्रसाद कोइरालानाप सहलह यायेधुंकाः वयेकलं संसदीय दलया ज्याकूथीयात थः बिरामी जुयाः भारत भ्रमणय् वनेमफुगु व दलया बैठकय् नं उपस्थित जुइमफुगु लिसः छ्वयादीगु खः ।
