'प्रधानमन्त्रीया भारत भ्रमण असफल'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' प्रधानमन्त्री माधवकुमार नेपालया भारत भ्रमण असफल जूगु टिप्पणी यानादीगु दु ।
शनिवाः विरगञ्जय् पत्रकारत नाप खँल्हाबंला यानादिसें अध्यक्ष प्रचण्डं भारतीय मिडियां बहिष्कृत जुयादिम्ह माधव नेपालया कारणं नेपाली प्रधानमन्त्रीया तःधंगु अपमान जूगु धयादिल । वयेकलं थः प्रधानमन्त्री जुया भारत भ्रमणय् वंगु ईलय् भारतीय मिडियां मुख्य समाचार दयेकूगु धयादिल, 'जी न्हापा जनताया जनमत ज्वना भ्रमणय् वनाःगु तर आः माधवकुमार नेपालया ल्यूने जनमत मदु ।'
अध्यक्ष प्रचण्डं माधव नेपालया नेतृत्वया सरकार नाप बहुमत मदुगुलिं हे प्रधानसेनापतिया सम्बन्धय् राष्ट्रपितं ल्ह्वंगु पलाः सदनय् बहस याये मब्यूगु द्वपं बियादिल । वयेकलं माओवादीं लोकतान्त्रिक प्रकृया मार्फत राष्ट्रपतिया पलाः विरुद्ध बहस व भोटिङया माग याःगु धयादिल ।
देशय् सहज स्थिति जुइवं माओवादी नेतृत्वया राष्ट्रिय सहमतिया सरकार गठन जुइगु दाबी यानादिसें माओवादी अध्यक्ष प्रचण्डं असहज परिस्थिति सहज मजूतल्ले सदन व सतकं संघर्ष जारी जुइगु ख्याच्वः बियादिल ।
