अयोग्य लडाकुतय् कारणं समस्या : शान्तिमन्त्री
शान्ति व पुनस्थापना मन्त्री रकम चम्जोङं अयोग्य लडाकुयात शिविर पाखें मलिकाःगु कारणं माओवादी लडाकुया व्यवस्थापन यायेत सरकारयात समस्या जूगु खँ धयादीगु दु ।
शुक्रवाः निजी व आवासिय विद्यालय अर्गनाइजेशन (प्याब्सनं) काभ्रेया भ्वतय् २०६५ सालया एसएलसीलय् उत्कृष्ट विद्यार्थी व शतप्रतिशत उतिर्ण जुपिंत सम्मान यायेगु ज्याझ्वलय् वयेकलं माओवादीं अयोग्य प्यद्वं मचाः लडाकुयात सेनाया कथं दुथ्याकूगु धयादिसें मसतय्त छ्यलाः माओवादीं थःपिं नाप यक्वः संख्याय् लडाकुत दु धकाः क्यनेत स्वःगु धयादिल ।
संयुक्त राष्ट्र संघं समेत अयोग्य धकाः छुटे यायेधुंकूगु प्यद्वं मसतय्त माओवादीं लडाकुया रुपय् शिविरय् तयातःगु धासें मन्त्री चेम्जोङं अपत्ति प्वंकादिल । वयेकलं मसतय्त सेना धायेगु धइगु अन्तर्राष्ट्रिय कानुन विपरित जूगु धयादिसें माओवादीं मसतय्त शिविरं चीकेमाःगु बिचाः प्वंकादिल । अथेहे वयेकलं शिविर दुने मसतय्त मानसिक व शाररिक रुपं पीडा बियाच्वंगु द्वपं नं बियादिल ।
