भारतय् कन्हय् हस्ताक्षर याइगु
येँ (सन्ध्या टाइम्स)/ अन्ततः नेपाः व भारत दथुइ कन्हय् वाणिज्य सन्धिइ हस्ताक्षर जुइगु जूगु दु। हस्ताक्षर लिपा नेपाःया औद्यौगिक उत्पादनयात भारतय् पहुँच अप्वयेकेत सन् १९९६ या नेपाः-भारत वाणिज्य सन्धिइ थप सुविधा दइगु जूगु दु ।
प्रधानमन्त्री माधव नेपालया भारत भ्रमणया मू एजेन्डा जुयाच्वंगु सन् १९९६ या वाणिज्य सन्धिइ थप सुविधा सहित संशोधन व परिमार्जन यायेत निगुलिं देय् सहमत जूगुलिं कन्हय् हस्ताक्षर जुइत्यंगु खः ।
प्रधानमन्त्रीया भारत भ्रमणय् दुथ्याःम्ह उद्योग वाणिज्य महासंघया अध्यक्ष कुशकुमार जोशीं ताःहाकःगु गृहकार्य लिपा वाणिज्य सन्धिइ हस्ताक्षर यायेत सहमति जूगु खँ कनादीगु दु ।
भारतं आः तक माने मजूगु विषयय् सहमति जुयाः थ्व हस्ताक्षर जुइत्यंगु जुयाः थुकियात उपलब्धीपूर्ण रुपं कायेमाःगु बिचाः प्रधानमन्त्रीया विदेश मामिला सल्लाहकार राजनकुमार भट्टराईं प्वंकादीगु दु। वय्कलं थप धयादी, 'थुगु सन्धि समानताया आधारय् जुइ ।'
तर स्वंगूगु मुलुकं नेपालय् सामान हयाः भारत निर्यात यायेगु नेपाःया प्रस्तावयात धाःसा भारतं अस्वीकार याःगु दु। उगु प्रस्तावयात संशोधन यानाः जक थ्व १४ बुँदे वाणिज्य सन्धि यायेत्यंगु खः ।
अथे हे नेपाः व भारतया व्यापारिक कारोबारया निंतिं चायेकातःगु २२ गू नाकायात नं थप यानाः २७ गू थ्यंकूगु दु ।
