विश्व बैंकया न्हूगु ग्वाहालि
येँ (सन्ध्या टाइम्स)/ताः ई निसें नेपाःया विकासया निंतिं ग्वाहालि याना वयाच्वंगु विश्व बैंकं नेपाःया निगू परियोजना न्ह्याकेत ८ अर्ब ४८ करोड ४० लाख तका बराबर दां ग्वाहालि याइगु जूगु दु ।
बैंकं १ अर्ब ९२ करोड ६० लाख तका दां अनुदान व ६ अर्ब ५५ करोड ८० लाख तका सहुलियतपूर्ण त्यासाया रुपय् बीगु सहमति जूगु दु ।
थ्व सम्बन्धी सम्झौतापत्रय् थौं अर्थ मन्त्रालयय् सचिव रामेश्वर खनाल व विश्व बैंकया आवासीय प्रतिनिधि सुसन गोल्डमार्कं हस्ताक्षर यानादीगु दु ।
अथे हे कृषि व्यावसायीकरणया निंतिं ८३ करोड २० लाख तका दां त्यासा व ७२ करोड १० लाख तका अनुदान ग्वाहालि बीगु नं सहमति जूगु दु ।
विश्व बैंकं नेपालय् आपालं ग्वाहालि याना वयाच्वंगु खःसां नं उकिया सदुपयोग मजू धकाः इलय् ब्यलय् विज्ञतय्सं न्ह्यसः थनेगु याना वयाच्वंगु दु ।
