थानकोटय् नेवाः ध्वाखा तइगु
येँ (सन्ध्या टाइम्स)/नेवाः स्वायत्त क्षेत्र दुने नं नेवाःतय् मू वस्ती स्वनिगः शुरु जुइगु थानकोट नाकाय् लाक्क नेवाः स्वशासित प्रदेशया कलात्मक ध्वाखा तइगु जूगु दु। 'नेवाः स्वायत्त प्रदेशया स्वनिगः लागाय् लसकुस दु' धकाः च्वयाः उगु ध्वाखा अन तयेत्यंगु खः ।
नेवाः स्वायत्त राज्य मंकाः संघर्ष समितिया म्हिगः च्वंगु मुँज्यां उगु निर्णय याःगु खःसा अन ध्वाखा तयेगु लागिं संघर्ष समितिपाखें लोकतान्त्रिक नेवाः संघया नायः सानुराजा शाक्यया संयोजकत्वय् छगू निर्माण समिति नं स्वंगु दु।
संघर्ष समितिया नायः पद स्वलाय् छक्वः हिलीगु प्रावधान कथं म्हिगःनिसें संघर्षया छगू घटक नेवाः देय् गुथि नेपालमण्डलया नायः नरेन्द्रभक्त हाडा न्हूम्ह नायः नियुक्त जुयादीगु दु। वय्कःयात म्हिगः पुलांम्ह नायः हितमान शाक्यं कार्यभार लःल्हानादीगु खः ।
समितिपाखें नेवाः ध्वाँय् दयेकेत याःगु आह्वान कथं वःगु ध्वाँय् ल्ययेत नं छगू समिति स्वंगु दु।
अथे हे समितिं थ्वहे वइगु भदौ ९ गते नेवाः सभासद्तलिसे अन्तर्क्रिया यायेगु नं निर्णय याःगु दु ।
